ଫଗୁଣ
ଉଡାଇ ଆସୁଥିବ ତୁମେ
ଅକୁହା କହିବା ପାଇଁ
************************
ଜୀବନରେ ଯେବେ
ସଞ୍ଜ ନଉଁଥିବ
ପଣତେ ସପନେ ତୁମେ
ଆସୁଥିବ,
ଓଠ ଥରୁଥିବ
କିଛି କହିବାକୁ
ପାଦ କହୁଥିବ
ଟିକେ ରହିବାକୁ,
ଛାତିରେ
ଛାତିଏ ଅକୁହା ବେଦନା
ଆସି ଯାଉଥିବ ଫେରି
କବରୀ କୁସୁମ
ଅଭିମାନେ ତୁମ
ପଡୁଥିବେ ଝରି
ଝରି,
ଝରା କୁସୁମକୁ
ସାଉଣ୍ଟୁଥିବି ମୁଁ
ରାତି ଆସୁଥିବ
ସରି
ଅବା ଶୋଇଥିବି ଶେଷ
ନିଦରେ ମୁଁ
ସପନ ମୋ ଦେଖି
ସାରି,
ଫଗୁଣ
ଉଡାଇ ଆସୁଥିବ ତୁମେ
ଅକୁହା କହିବା ପାଇଁ
ଶ୍ରାବଣ
ସାଉଁଟି ମୁଁ ଯାଇଥିବି
ଅଫେରା ଫେରାରେ ଶୋଇ,
ଅଗଣାରେ
ଥିବ ରାମନାମ ସତ୍ୟ
ବିଦାୟର ସାହାନାଇଁ
ତୁମେ
ଆସୁଥିବ କହିବାକୁ ଯାହା
ସେଦିନ ନଥିଲ କହି…..।।
ତପନ ଦୀକ୍ଷିତ(ବେଳା ଭୂମି) 16.8.2018
ନାଶିକେଶ୍ୱର,
କାକଟପୁର, ପୁରୀ ,ଓଡ଼ିଶା
No comments:
Post a Comment